ភ្នំពេញ៖ តំណាងក្រសួងព័ត៌មានបានអញ្ជើញតំណាងសារព័ត៌មានវីអូឌីមកជួបប្រជុំគ្នាដើម្បីឲ្យបកស្រាយពាក់ព័ន្ធទៅនឹងការចុះផ្សាយព័ត៌មានដែលថាលោក ហ៊ុន ម៉ាណែត ចុះហត្ថលេខាផ្ដល់ជំនួយទៅតួកគីជំនួសនាយករដ្ឋមន្ត្រី។ នេះបើយោងតាមការចុះផ្សាយរបស់ទូរទស្សន៍ជាតិ។

ទូរទស្សន៍ជាតិបានចុះផ្សាយថា៖ «នៅព្រឹកថ្ងៃទី១២ ខែកុម្ភៈ ឆ្នាំ២០២៣ តំណាងក្រសួងព័ត៌មាន បានអញ្ជើញតំណាងវិទ្យុ VOD បានជួបប្រជុំគ្នាដើម្បីឱ្យតំណាងវិទ្យុ VOD បកស្រាយពាក់ពន្ធ័ការមួលបង្កាច់ពីវិទ្យុ VOD មកលើ ឯកឧត្តម ហ៊ុន ម៉ាណែត»។

ជំនួបនេះគឺបន្ទាប់ពី នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានបន្ថយពេលវេលាឲ្យសារព័ត៌មានអនឡាញ VOD សុំទោសក្នុងរយៈពេល ២៤ម៉ោងវិញក្រោយពីមានអ្នកខំមិនម្នាក់ស្នើឱ្យរដ្ឋាភិបាលទុកពេលសម្រាប់ស្ថាប័ននេះបកស្រាយ។

សម្ដេចតេជោបានសរសេរនៅលើហ្វេសប៊ុករបស់សម្ដេចនៅថ្ងៃទី១២ ខែកុម្ភៈថា៖ «ពេលនេះខ្ញុំសម្រេចកាត់បន្ថយពេលវេលាសូមទោសមកនៅត្រឹម២៤ម៉ោងគឺកំណត់ត្រឹមម៉ោង១០:០០នាទីព្រឹកថ្ងៃទី១៣ ខែកុម្ភៈ ២០២៣វិញ»។

បន្ថែមលើនេះសម្ដេចក៏បញ្ជាឲ្យក្រសួងព័ត៌មានលុបចោលអាជ្ញាប័ណ្ណបញ្ចប់ការផ្សាយរបស់ VOD តែម្ដង ត្រឹមម៉ោង១០ៈ០០នាទី ថ្ងៃទី១៣ ខែកុម្ភៈ ឆ្នាំ២០២៣ ស្អែកនេះក្នុងករណីដែលសារព័ត៌មានអនឡាញនេះមិនបានធ្វើការសូមទោស។

សម្ដេចថា៖ «ដំបៅមិនឈឺកុំយកឈើចាក់។ បើគង់តែពួកគេចោទថាខ្ញុំប្រើអំណាចខ្ញុំត្រូវតែប្រើអំណាចនេះដើម្បីបំពេញបំណងរបស់ពួកគេ»៕